مين آي مينيو

أثناء فترة أنتشار الجائحة وروحتنا للمطاعم ، كمنا نحاول منلزم المينيو ، وأذا المطعم ماعدهم مينيو الكتروني واللي هو حقيقة مو الكتروني من صدك، مجرد بي دي أف ومصعديه على الكوكل درايف وحجمه فد 30 ميكا يعني كوة يتحمل على التلفون وبيه مشاكل بالعرض وتظل تصغر وتكبر حتى تشوفه والخ الخ الخ ، بس هم ميخالف أحسن من ما واحد يجيبلنا المينيو صاير أسود من اللزم ومتدري شبيه من جراثيم وأمراض! ونتيجة لهاي الأسباب ، طلعت براسنا فكرة المشروع!
بما أنه أحنا بمجال تكنولوجيا المعلومات من باب ومهتمين بالبيئة والصحة العامة من باب ثاني ونريد نمنع أنتشار الأمراض، فليش ما نسوي فكرة تكون مفيدة لصاحب المطعم وللناس وللبيئة؟
هسة تكلي مفيدة للناس أنه تمنع انتشار الأمراض وهاي افتهمناها بس شلون لصاحب المطعم والبيئة؟ أكلك حقك ، بس ما دام سألت هالسؤال الحلو فخليك وياية وكمل قراية ليجوة. أول شي حيفيد صاحب العمل لأن حيخلصه من طباعة المينيو نهائياً، وبعد ميحتاج يطبع مينيو جديد ورة كل تعديل بسيط بالوجبات أو الأسعار أو التصميم، لا والحلو بالأضافة والتعديل أنه ميطول أكثر من دقايق! يعني حنوفرله هواية مصاريف ومنريد نحجي بالطشة، كلة تكنولوجيا وترتيبات.
أما بالنسبة للبيئة، فأول شي الورق يتم تصنيعة من الأشجار ، وما دام أنت تستخدم الورق بالمينيو فأنت دتشجع قص الأشجار، بالمقابل أذا ماراح تستخدم الورق فراح تحمي الأشجار. الشغلة الثانية هنا أنه اغلب الورق يكون مغلف بنايلون أو مكبوس او غيرها وهذا يخليه ميتحلل بالطبيعة لأن بيه نفايات بلاستيكية وهذا يلوث الطبيعة.
وية كل اللي كلناه فوك، وبمجهود الشباب وعمل مستمر خرجنا بفكرة آي مينيو ، وأحنا شركة ناشئة عراقية من مجموعة شباب يعني منك وبيك.